"Атлетико" бош мураббийи Диего Симеоне ҳужумчи Хулиан Альвареснинг жамоадаги келажаги бўйича клуб раҳбариятининг позицияси ўзгармаганини маълум қилди.
Аргентиналик мутахассис "Малага"га қарши Ла Лига учрашуви олдидан ўтказилган матбуот анжуманида Альвареснинг эҳтимолий трансфери ва унинг ҳозирги жисмоний ҳолати ҳақида гапирди.
"Агар клуб раҳбарияти бу борада шунчалик қатъий фикр билдирган бўлса, унда муҳокама қиладиган ҳеч нарса йўқ. Бу худди суд жараёнига ўхшайди. Айтилган гаплар ҳаммасини жуда аниқ кўрсатиб турибди.
Биз спорт томонига эътибор қаратмоқдамиз. Инсон ва футболчи сифатида унга ғамхўрлик қилиб, энг яхши жисмоний ҳолатга келишини таъминлашга ҳаракат қиляпмиз.
У "Малага"га қарши бу учрашувда иштирок этмайди. Умид қиламанки, яқин кунларда яна формага кириб, биз уни кўришни истаётган ҳолатга яқинлашади", — деди Симеоне.
Альвареснинг келажаги ёзги трансфер ойнасининг асосий мавзуларидан бирига айланган. 26 ёшли аргентиналик ҳужумчи жаҳон чемпионати вақтида клубдан кетиш у ва "Атлетико" учун энг яхши ечим бўлиши мумкинлигини очиқ айтганди. Айни пайтда "Барселона" президенти Жоан Лапорта каталонияликлар футболчи учун таклиф киритганини тасдиқлаган.
Шунга қарамай, "Атлетико" бош директори Мигель Анхель Хиль Марин Альваресни сотиш режада йўқлигини билдирган. Симеоне ҳам аввалроқ клуб қарори аниқ эканини таъкидлаб, ҳужумчи билан ишлашда давом этишини айтган.
AS маълумотига кўра, Мадрид клуби Альваресни 2026/27 йилги мавсумдаги лойиҳанинг асосий футболчиларидан бири сифатида кўрмоқда. "Атлетико" унинг трансфери масаласида 500 млн евролик товон пули бандига таянаётгани, "Барселона" томонидан билдирилган 100 млн евролик таклиф эса клуб талабидан анча паст экани хабар қилинган.
Симеоне эса Альваресни жамоанинг ҳужумдаги энг кучли футболчиси деб атаб, келгусида унинг салоҳияти ва маҳоратидан максимал даражада фойдаланадиган жамоа қуриш нияти борлигини таъкидлади.
"Атлетико" ва "Малага" ўртасидаги учрашув 19 август куни "Метрополитано" стадионида бўлиб ўтади. Мазкур баҳс жаҳон чемпионатида қатнашган футболчиларга қўшимча дам бериш мақсадида Ла Лиганинг биринчи туридан кейинроқ муддатга кўчирилган.
