Ҳужумчи Мемфис Депай "Коринтианс" сафидаги фаолиятини давом эттиради.
ESPN хабарига кўра, Бразилия клуби нидерландиялик футболчи билан шартномани 2028 йил ёзига қадар узайтириш бўйича келишувга эришди.
Музокаралар якунланганидан сўнг Депай жамоа ихтиёрига қайтди ва сешанба куни машғулотларга киришди. Клубда ҳужумчи 20 август куни Либертадорес кубоги 1/8 финали жавоб баҳсида "Росарио Сентраль"га қарши майдонга тушишига умид қилишмоқда.
Жамоалар ўртасида Аргентинада ўтган дастлабки учрашув 0:0 ҳисобида якунланган.
Депай 2024 йилдан буён "Коринтианс" шарафини ҳимоя қилиб келмоқда. У Бразилия клуби сафида 79 та учрашувда майдонга тушиб, 20 та гол урган ва 15 та голли узатмани амалга оширган.
