Италиялик ярим ҳимоячи Мануэль Локателли 2016 йилдан 2019 йилга қадар «Милан» шарафини ҳимоя қилган ва ҳанузгача клубдаги даврини илиқ хотиралар билан эслайди.
«Мен “Милан”дан доимо миннатдор бўлиб қоламан. Бу ерда барча босқичларни босиб ўтдим, клуб менинг уйим эди. Шунингдек, менга ишонч билдирган Монтеллага ҳам ҳар доим миннатдор бўламан.
Ўша пайтда ҳамма нарсани тўғри енгиб ўтиш учун етарли тажриба ва кўникмаларга эга эмасдим. Мен ҳали жуда ёш ва етарлича етук эмасдим. Мендан жуда катта умидлар қилишган, мен эса бу босимни янада кучлироқ ҳис қилардим. Айниқса, “Ювентус” дарвозасига урган ўша голимдан кейин», — дея Локателлининг сўзларини pianetamilan.it келтиради.
Эслатиб ўтамиз, Италия чемпионатининг янги мавсуми шу ҳафта охирида старт олади.
