«ПСЖ»нинг янги футболчиси Мики Годтснинг агенти Нильс Де Йонк бельгиялик ҳужумчининг «Аякс»дан Париж клубига ўтиши ҳақида фикр билдирди.

«Мики ўйин вақтини ўзига муносиб тарзда қўлга киритиши керак бўлади. «ПСЖ»дек клубда ҳеч кимга ҳеч нарса тайёр ҳолда тақдим этилмайди, ҳатто сизнинг трансферингиз учун қарийб 55 миллион евро тўланган бўлса ҳам. «ПСЖ»да у ҳаммасини нолдан бошлайди.

Биз учун бу трансфер Мики Парижда ҳам футболчи, ҳам инсон сифатида ривожланишда давом этса ва охир-оқибат энг юқори даражадаги муҳим футболчилардан бирига айланса, муваффақиятли ҳисобланади. «ПСЖ» — финиш чизиғи эмас, балки янги бошланиш. Худди 2023 йилда «Аякс» билан бўлгани каби», — дея Де Йонкнинг сўзларини келтиради De Telegraaf.

21 ёшли футболчи ўтган ҳафта Париж клуби билан 2031 йилга қадар мўлжалланган шартнома имзолади. У «ПСЖ» сафида 22-рақам остида тўп тепади.