«Челси» ҳужумчиси Николас Жексон фаолиятини Мадриднинг «Атлетико» клубида давом эттириши мумкин.

Marca нашрининг хабар беришича, пайшанба куни «Атлетико» спорт директори Матеу Алемани 25 ёшли сенегаллик форварднинг ижара трансферини муҳокама қилиш учун Лондонга учиб келган. Мадрид клубида ҳужум чизиғини кучайтириш учун бир нечта вариантлар мавжуд бўлса-да, айнан Жексон номзоди асосий ва устувор деб ҳисобланмоқда.

«Атлетико» раҳбарияти келишув амалга ошган тақдирда «Челси» футболчи маошининг маълум бир қисмини ўз зиммасига олишига умид қилмоқда. COPE хабарига кўра, лондонликлар ҳам, Николаснинг ўзи ҳам Мадрид клубига ўтиш вариантига ижобий муносабат билдиришган.

Ўтган мавсумда Жексон ижара ҳуқуқи асосида «Бавария» шарафини ҳимоя қилган эди. У Бундеслига доирасида 23 та ўйинда майдонга тушиб, 8 та гол уришга эришган.