«Chelsi» hujumchisi Nikolas Jekson faoliyatini Madridning «Atletiko» klubida davom ettirishi mumkin.

Marca nashrining xabar berishicha, payshanba kuni «Atletiko» sport direktori Mateu Alemani 25 yoshli senegallik forvardning ijara transferini muhokama qilish uchun Londonga uchib kelgan. Madrid klubida hujum chizig‘ini kuchaytirish uchun bir nechta variantlar mavjud bo‘lsa-da, aynan Jekson nomzodi asosiy va ustuvor deb hisoblanmoqda.

«Atletiko» rahbariyati kelishuv amalga oshgan taqdirda «Chelsi» futbolchi maoshining ma’lum bir qismini o‘z zimmasiga olishiga umid qilmoqda. COPE xabariga ko‘ra, londonliklar ham, Nikolasning o‘zi ham Madrid klubiga o‘tish variantiga ijobiy munosabat bildirishgan.

O‘tgan mavsumda Jekson ijara huquqi asosida «Bavariya» sharafini himoya qilgan edi. U Bundesliga doirasida 23 ta o‘yinda maydonga tushib, 8 ta gol urishga erishgan.