«Манчестер Юнайтед» ярим ҳимоячиси Бруну Фернандеш EA FC футбол симуляторида ўзига берилган кўрсаткичларга муносабат билдирди.

Португалиялик футболчи умумий рейтингидан норози эмаслигини, бироқ ўйин яратувчилари унинг тезлигини паст баҳолаган деб ҳисоблашини ҳазиломуз тарзда айтди.

«EA FC'даги рейтингларимдан мамнунманми? Менимча, уларни кўрдим. Тўғриси, айнан якуний версиясини кўрганимга ишончим комил эмас.

Умуман олганда, мамнунман. Лекин кўрганларимга қараганда, мени бироз секин қилиб қўйишибди. У ерда айрим футболчилар мендан тезроқ экан.

Витиня ҳеч қандай ҳолатда мендан тез бўлиши мумкин эмас. Бу энди уларнинг хатоси. Аммо майли», — деди Фернандеш.

Шу тариқа, «Манчестер Юнайтед» футболчиси Португалия миллий жамоасидаги шериги Витинянинг EA FC'да ундан юқори тезлик кўрсаткичига эга бўлишини ҳазил билан танқид қилди.

Фернандеш ва «ПСЖ» ярим ҳимоячиси Витиня Португалия миллий жамоасининг марказий чизиғидаги асосий футболчилардан ҳисобланади.