«Manchester Yunayted» yarim himoyachisi Brunu Fernandesh EA FC futbol simulyatorida o‘ziga berilgan ko‘rsatkichlarga munosabat bildirdi.
Portugaliyalik futbolchi umumiy reytingidan norozi emasligini, biroq o‘yin yaratuvchilari uning tezligini past baholagan deb hisoblashini hazilomuz tarzda aytdi.
«EA FC'dagi reytinglarimdan mamnunmanmi? Menimcha, ularni ko‘rdim. To‘g‘risi, aynan yakuniy versiyasini ko‘rganimga ishonchim komil emas.
Umuman olganda, mamnunman. Lekin ko‘rganlarimga qaraganda, meni biroz sekin qilib qo‘yishibdi. U yerda ayrim futbolchilar mendan tezroq ekan.
Vitinya hech qanday holatda mendan tez bo‘lishi mumkin emas. Bu endi ularning xatosi. Ammo mayli», — dedi Fernandesh.
Shu tariqa, «Manchester Yunayted» futbolchisi Portugaliya milliy jamoasidagi sherigi Vitinyaning EA FC'da undan yuqori tezlik ko‘rsatkichiga ega bo‘lishini hazil bilan tanqid qildi.
Fernandesh va «PSJ» yarim himoyachisi Vitinya Portugaliya milliy jamoasining markaziy chizig‘idagi asosiy futbolchilardan hisoblanadi.
