«Челси»нинг бразилиялик ҳужумчиси Дейвид Вашингтон ёзги трансфер ойнаси якунлангунига қадар Лондон клубини тарк этиши мумкин.

Foot Mercato журналисти Санти Ауна маълумотига кўра, 21 ёшли футболчига қизиқиш билдираётган клублар қаторига «Марсел» ҳам қўшилди. Франция клуби Вашингтоннинг эҳтимолий трансфери шартлари бўйича маълумот сўраган.

Ҳужумчининг ўзи ҳам Марселга кўчиб ўтиш вариантига бефарқ эмас. Манбага кўра, Вашингтон Франция клубидаги вазият ҳақида маълумот олиш мақсадида ҳамюрти Луис Энрике билан ҳам боғланган.

Бироқ «Марсел» ҳозирча футболчи учун расмий таклиф киритмаган. Бу борада «Страсбур» ва «Севилья» бир қадам олдинда — ҳар икки клуб «Челси»га ўз таклифини тақдим этган.

Вашингтоннинг «Стэмфорд Бриж»ни тарк этиши кутилаётган бўлса-да, «Челси» уни ижарага беришни режалаштираётгани ёки тўлиқ сотишга тайёрлиги ҳозирча аниқ эмас.

Дейвид Вашингтон «Челси»га 2023 йил ёзида Бразилиянинг «Сантос» клубидан келиб қўшилган. Лондонликлар ўшанда 18 ёшли ҳужумчи билан етти йиллик шартнома имзолаган эди. У «Челси»нинг асосий таркибида етарлича ўйин амалиётига эга бўла олмади ва кейинчалик ижара асосида «Сантос»га қайтди.

Энди бразилиялик футболчининг фаолияти Европада давом этиши мумкин. Айни пайтда «Страсбур» ва «Севилья» расмий таклиф билан чиққан бўлса, «Марсел» ҳам трансфер учун курашга қўшилган.