«Chelsi»ning braziliyalik hujumchisi Deyvid Vashington yozgi transfer oynasi yakunlanguniga qadar London klubini tark etishi mumkin.

Foot Mercato jurnalisti Santi Auna ma’lumotiga ko‘ra, 21 yoshli futbolchiga qiziqish bildirayotgan klublar qatoriga «Marsel» ham qo‘shildi. Fransiya klubi Vashingtonning ehtimoliy transferi shartlari bo‘yicha ma’lumot so‘ragan.

Hujumchining o‘zi ham Marselga ko‘chib o‘tish variantiga befarq emas. Manbaga ko‘ra, Vashington Fransiya klubidagi vaziyat haqida ma’lumot olish maqsadida hamyurti Luis Enrike bilan ham bog‘langan.

Biroq «Marsel» hozircha futbolchi uchun rasmiy taklif kiritmagan. Bu borada «Strasbur» va «Sevilya» bir qadam oldinda — har ikki klub «Chelsi»ga o‘z taklifini taqdim etgan.

Vashingtonning «Stemford Brij»ni tark etishi kutilayotgan bo‘lsa-da, «Chelsi» uni ijaraga berishni rejalashtirayotgani yoki to‘liq sotishga tayyorligi hozircha aniq emas.

Deyvid Vashington «Chelsi»ga 2023 yil yozida Braziliyaning «Santos» klubidan kelib qo‘shilgan. Londonliklar o‘shanda 18 yoshli hujumchi bilan yetti yillik shartnoma imzolagan edi. U «Chelsi»ning asosiy tarkibida yetarlicha o‘yin amaliyotiga ega bo‘la olmadi va keyinchalik ijara asosida «Santos»ga qaytdi.

Endi braziliyalik futbolchining faoliyati Yevropada davom etishi mumkin. Ayni paytda «Strasbur» va «Sevilya» rasmiy taklif bilan chiqqan bo‘lsa, «Marsel» ham transfer uchun kurashga qo‘shilgan.