"Тоттенхэм" бош мураббийи Роберто Де Дзерби жамоа ҳимоячилари Микки ван де Вен ва Педро Порро Англия Премьер-лигаси янги мавсумининг биринчи турида "Брентфорд"га қарши майдонга тушмаслигини тасдиқлади.
"Микки эртанги ўйин қайдномасида бўлмайди. Педро Порро ҳам учрашувни ўтказиб юборади", — дея Де Дзербининг сўзларини келтиради Metro.
Ван де Вен Австралиядаги мавсумолди йиғини вақтида кичик жароҳат олганди. Нидерландиялик футболчи ҳозирда умумий гуруҳ билан машғулот ўтказмоқда. Де Дзерби аввалроқ унинг жароҳати жиддий эмаслигини айтган, бироқ клуб ҳимоячининг соғлиғини хавф остига қўйишни истамаяпти.
Порронинг ўйинни ўтказиб юборишига аниқ нима сабаб бўлгани ҳозирча маълум қилинмаган. Испаниялик футболчи жаҳон чемпионатидан кейин машғулотларга кечроқ қайтгани сабабли унга тикланиш учун қўшимча вақт берилган бўлиши мумкин.
Кутилишича, "Брентфорд"га қарши баҳсда ўнг қанот ҳимоясида Порронинг ўрнини Арчи Грей эгаллайди. Жед Спенс "Интер"га сотилганидан кейин Порро "Тоттенхэм" таркибидаги ягона номинал ўнг қанот ҳимоячиси бўлиб қолган.
