"Ливерпуль" ва Англия терма жамоасининг собиқ ҳужумчиси Майкл Оуэн ўғли Жеймснинг соғлиғи билан боғлиқ муаммолар ҳақида гапириб, кўз ёшларини тия олмаганини тан олди.
20 ёшли Жеймсга кам учрайдиган ирсий кўз касаллиги — Штаргардт касаллиги ташхиси қўйилган. У кўриш қобилиятининг босқичма-босқич ёмонлашишига олиб келади ва ҳозирча уни тўлиқ даволаш усули мавжуд эмас.
"Унга илк бор ташхис қўйилганида, машинада кетаётиб уч-тўрт марта тўхтаганимни эслайман. Шунчаки ўтириб, йиғлаганман", — деди Оуэн Amazon'га берган интервьюсида.
Жеймсга Штаргардт касаллиги саккиз ёшида ташхис қўйилган. Касаллик туфайли у профессионал футболчи бўлиш орзусидан ҳам воз кечишга мажбур бўлган.
