ФИФА президенти Жанни Инфантино ташкилот раҳбарияти атрофидаги можаро фонида Sky News журналисти Жеймс Мэттьюснинг саволларига кутилмаган тарзда жавоб қайтарди.
Журналист Инфантинони меҳмонхона олдида учратиб, ундан «футболга хиёнат қилган-қилмагани» ва нима учун истеъфога чиқиш нияти йўқлигини сўради. ФИФА раҳбари эса саволларга мазмунан жавоб бериш ўрнига журналистнинг соч турмагига эътибор қаратди. Ҳар иккиси ҳам кал эди.
«Соч турмагинг зўр экан», — деди Инфантино.
Мэттьюс шундан кейин ҳам истеъфо ва ФИФА раҳбариятига бўлган ишонч ҳақида саволлар беришда давом этди. Инфантино эса машинага ўтирар экан:
«Сартарошхонада кўришамиз», — дея жавоб қайтарди.
Сўнгги вақтларда Инфантино ФИФА мусобақаларининг тижорий ҳуқуқларига хусусий инвестицияларни жалб қилиш режаси билан боғлиқ можаро сабаб жиддий босим остида қолди. Кейинчалик ушбу лойиҳа бекор қилинган бўлса-да, ФИФА президентига нисбатан танқидлар давом этмоқда.
