«Женоа» бош мураббийи Даниэле Де Росси «Наполи»га қарши учрашув якунларини изоҳлади. Генуяликлар иккинчи бўлимда иккита гол ўтказиб юборди ва 0:2 ҳисобида мағлуб бўлди.

Баҳсдан кейин Де Росси кўнглидаги барча фикрни очиқ айтишга тайёр эмаслигини билдирди.

«Бугунги ўйин ҳақида аслида нима деб ўйлаётганимни айтгим келмайди. Менимча, сукут сақлаганим маъқул. Бу мағлубият ўтган йилгидан ҳам оғриқлироқ.

Биз бошқа стадионларда очко тўплаймиз. Йигитларимга нисбатан қаттиққўл бўла олмайман. Дастлабки 50 дақиқа давомида «Наполи»га қарши жуда яхши ҳаракат қилдик.

Кейин эса... «Наполи» — буюк жамоа. Уларнинг устунликни қўлга киритиши табиий ҳол», — дея Де Россининг сўзларини calcionapoli1926.it келтирди.

Эслатиб ўтамиз, «Женоа» ўтган мавсумни чемпионат турнир жадвалида 16-ўринда якунлаганди.