«Ал-Ҳилол» уругвайлик ҳужумчи Дарвин Нуньеснинг «Ал-Дирия» клубига ижарага берилганини расман эълон қилди. Келишув 2026/27 йилги мавсум охирига қадар амал қилади. Хабарларга кўра, битимда футболчини сотиб олиш ҳуқуқи кўзда тутилмаган.

Нуньесни ижарага бериш тўғрисидаги қарор клуб президенти шаҳзода Наваф бин Саад бошчилигидаги «Ал-Ҳилол» директорлар кенгаши томонидан маъқулланган.

27 ёшли ҳужумчи «Ал-Ҳилол» сафига 2025 йил ёзида «Ливерпуль»дан келиб қўшилганди. Ўтган мавсумда у Саудия клуби сафида 24 та учрашув ўтказиб, 9 та гол урди ва 5 та голли узатмани амалга оширди.

Мавсум давомида Нуньес «Ал-Ҳилол»нинг легионерлар лимити билан боғлиқ муаммолари сабаб Саудия чемпионати учун қайдномадан чиқариб юборилганди. Шу боис у мавсумнинг иккинчи қисмида ички чемпионат ўйинларида иштирок эта олмади.

Transfermarkt портали Дарвин Нуньеснинг ҳозирги бозор қийматини 20 миллион еврога баҳоламоқда.