«Ювентус» бош мураббийи Лучано Спаллетти туркиялик ҳужумчи Кенан Йилдизнинг Лондоннинг «Арсенал» клубига эҳтимолий трансфери ҳақидаги хабарларга муносабат билдирди.

Италиялик мутахассис ўз шогирди атрофидаги миш-мишларга катта аҳамият бермади. Спаллеттининг сўзларига кўра, Йилдиз ҳозирча «Ювентус» футболчиси бўлиб қолмоқда ва мураббий янги мавсумда унга ишонч билдирмоқда.

«Бошқа клублар ўзлари истаган таклифларни беришаверсин. Мен учун энг муҳими — Кенан ҳозир «Ювентус» футболчиси ва мен унинг бизда ўйнашда давом этишини хоҳлайман. Унинг кейинги фаолияти клуб учун катта аҳамиятга эга», — деди Спаллетти.

Аввалроқ «Арсенал» 20 ёшли туркиялик ҳужумчи учун тахминан 100 миллион евро таклиф қилишга тайёр экани хабар қилинганди.

Ўтган мавсумда Йилдиз Италия чемпионатида 36 та учрашув ўтказиб, 10 та гол урди ва 6 та голли узатмани амалга оширди.