Ўзбекистон Суперлигасининг 19-туридан ўрин олган "Нефтчи" — "Сўғдиёна" учрашуви фарғоналикларнинг 3:0 ҳисобидаги йирик ғалабаси билан якунланди.
23 август куни Фарғонадаги "Истиқлол" стадионида ўтказилган баҳсда ҳисоб 23-дақиқада очилди. "Нефтчи" ҳужумчиси Зоран Марушич рақиб дарвозасини ишғол қилиб, жамоасини олдинга олиб чиқди.
Иккинчи бўлимда Марушич яна бир бор ўзини кўрсатди. У 58-дақиқада иккинчи голини киритиб, дублни расмийлаштирди.
Учрашувга қўшиб берилган вақтнинг 9-дақиқасида захирадан майдонга тушган Стипе Перица учинчи голни урди ва якуний ҳисобни ўрнатди — 3:0.
Шу тариқа, "Нефтчи" ўз майдонида "Сўғдиёна"ни йирик ҳисобда мағлубиятга учратди.
Учрашувни Ғайрат Жўраев бошқарди. Баҳс давомида "Нефтчи" футболчиси Боян Цигер 34-дақиқада, "Сўғдиёна" вакили Абдулазизхон Абдурашидов эса 37-дақиқада сариқ карточка билан огоҳлантирилди.
