«Кристал Пэлас» ҳужумчиси Жан-Филипп Матета Лондон клуби билан амалдаги шартномасининг сўнгги қисмини ҳақиқий эмас деб топишга ҳаракат қилмоқда.

BBC маълумотига кўра, 29 ёшли француз футболчиси 2027 йил июнигача мўлжалланган шартномасининг сўнгги 10 ойини бекор қилишни талаб қилган.

Матета «Кристал Пэлас»га 2021 йилда «Майнц»дан дастлаб ижара асосида келган. 2022 йил январда лондонликлар унинг трансфер ҳуқуқини сотиб олиб, 4,5 йиллик шартнома имзолаган. Келишувда яна бир мавсумга узайтириш имконияти ҳам мавжуд бўлган ва клуб 2024 йилда ушбу бандни фаоллаштирган.

Бироқ Матета қўшимча бир йиллик муддатни ҳақиқий эмас деб ҳисобламоқда. Масала аввал Премьер-лига қоидалари асосида мустақил трибуналда кўриб чиқилган, аммо футболчининг шартномаси ўз кучида қолдирилган.

Шундан сўнг Матета ФИФАга мурожаат қилган. Бироқ ташкилот ушбу масалани кўриб чиқиш унинг ваколатига кирмаслиги ҳақида қарор чиқарган.

Француз ҳужумчиси 2021 йилдан буён «Кристал Пэлас» шарафини ҳимоя қилиб келмоқда ва клуб сафида 67 та гол урган. У жамоа билан Англия кубоги ва Конференциялар лигасида ғолиб чиққан.

Матета жорий йил январда «Кристал Пэлас»ни тарк этишга яқин келган ва «Милан»га ўтиши кутилганди. Бироқ тиззаси билан боғлиқ муаммо сабаб трансфер амалга ошмаган.

Шунингдек, Матета Франция миллий жамоаси сафида сўнгги жаҳон чемпионатида иштирок этган.