"Манчестер Сити" "Палмейрас" вингери Алланни ёзги трансфер ойнаси ёпилгунига қадар ўз сафига қўшиб олиш учун ҳаракат қилмоқда.

Манбага кўра, "шаҳарликлар" 22 ёшли бразилиялик футболчи бўйича музокараларда олдинга силжиган. Бироқ "Палмейрас" ўз етакчиларидан бирини арзон нархга сотиш ниятида эмас.

Алланнинг шартномасида 100 млн евро миқдорида товон пули белгиланган. "Манчестер Сити" эса трансферни ушбу сумманинг ярмидан ҳам камроғига амалга оширишга умид қилмоқда.

"Палмейрас" бош мураббийи Абел Феррейра футболчининг ҳужумда ҳам, ҳимояда ҳам самарали ҳаракат қила олишини унинг асосий устунликларидан бири сифатида таъкидлади.

"Бундай клублар Аллан каби футболчини хоҳлайди, чунки вингерларнинг 90 фоизи у қилаётган ишни бажара олмайди — у ҳам ҳужум қилади, ҳам ҳимояланади. Шунинг учун улар пул тўлашига тўғри келади. Мен "Манчестер Сити" қандай ўйнашини биламан", — деди Феррейра.

Португалиялик мутахассис Алланни "Челси" вингери Педру Нету билан ҳам таққослади.

"Масалан, "Челси"да Педру Нету бор. Агар уни сотиб олмоқчи бўлсангиз, 100 млн евро тўлашингизга тўғри келади", — дея қўшимча қилди мураббий.

Алланнинг бир нечта позицияда ўйнай олиши ҳам "Манчестер Сити"нинг унга бўлган қизиқишини кучайтирган. Англия клуби Савиньонинг эҳтимолий кетиши фонида қанот чизиғини яна бир футболчи билан кучайтиришни режалаштирмоқда.