«Интер» ярим ҳимоячиси Хакан Чалханоглу 2026/27 йилги мавсум якунланганидан сўнг эркин агент сифатида жамоани тарк этиши мумкин. 32 ёшли туркиялик футболчининг Милан клуби билан шартномаси 2027 йил 30 июнда якунига етади. Ҳозирча томонлар келишувни узайтириш масаласини муҳокама қилмаган.
«Нерадзурри» ярим ҳимоя чизиғида етарлича футболчиларга эга бўлгани сабабли клуб бу вазиятни жиддий муаммо деб ҳисобламаяпти. Шунга қарамай, Чалханоглу таянч ярим ҳимоячиси сифатида жамоанинг муҳим футболчиларидан бири бўлиб қолмоқда.
Аввалроқ Туркиянинг «Галатасарой» ва «Фенербахче» клублари Чалханоглуга қизиқиш билдирган ва уни ўз сафига қўшиб олиш учун курашишга тайёр.
Футболчининг ўзи эса «Интер»даги эҳтимолий сўнгги мавсумини юқори савияда ўтказиб, клубдаги фаолиятини муносиб тарзда якунлаш ниятида.
