«Атлетико» ярим ҳимоячиси Мортен Юлманд Ла Лиганинг 2-туридан ўрин олган «Вильярреал»га қарши ўйиндан (2:2) сўнг таассуротлари билан ўртоқлашди. Даниялик футболчи мазкур баҳсда мадридликлар сафида илк бор тўлиқ 90 дақиқа ҳаракат қилди.

«Бу ерда эканимдан, шу стадионда ва шундай савиядаги футболчилар билан бирга ўйнаётганимдан жуда фахрланаман. «Малага»га қарши дебютимдан ҳам, бугун «Вильярреал»га қарши 90 дақиқа ўйнаганимдан ҳам жуда хурсандман.

Аммо пенальтига сабаб бўлганимдан ва натижадан қониқмадим», — деди Юлманд клуб матбуот хизматига.

«Вильярреал»га қарши учрашувда Юлманднинг қоидабузарлигидан сўнг рақиб пенальти тепиш ҳуқуқини қўлга киритди ва Жерар Морено ҳисобни тенглаштирди. Учрашув якунда 2:2 ҳисобида якунланди.