"Милан" ҳужумчиси Рафаэл Леау ёзги трансфер ойнаси ёпилгунига қадар жамоасини ўзгартириши мумкин.

Журналист Саша Тавольерининг хабар беришича, португалиялик футболчи "Милан" раҳбариятига клубдан кетадиган бўлса, фақат "Галатасарой"га ўтишга тайёр эканини маълум қилган. Акс ҳолда у Италия жамоасида қолишни режалаштирмоқда. Сўнгги соатларда Леау бўйича иккита таклиф рад этилгани ҳам айтилмоқда.

"Галатасарой" 27 ёшли футболчини ёз давомида ўз сафига қўшиб олишга ҳаракат қилмоқда. Август ойи бошида турк клуби Леау учун 30 млн евро ва яна 5 млн евро бонуслар кўринишида таклиф берган, бироқ "Милан" уни етарли эмас деб ҳисоблаб, рад этган. Италия клуби футболчиси учун тахминан 50 млн евро талаб қилаётгани хабар қилинган.

Шунингдек, Леауга "Фенербаҳче" томонидан ҳам қизиқиш бўлган, аммо футболчи бу вариантни маъқулламаган. Италия матбуоти маълумотига кўра, португалиялик футболчининг "Милан" билан амалдаги шартномаси 2028 йилга қадар мўлжалланган.

Леау 2019 йилдан буён "Милан" шарафини ҳимоя қилиб келади. У Италия клуби сафида 200 дан ортиқ ўйин ўтказган. 2025/26 йилги А Серия мавсумида ҳужумчи 29 та учрашувда 9 та гол урди ва 3 та голли узатма берди.

Эслатиб ўтамиз, Леау "Милан"га Франциянинг "Лилль" клубидан келиб қўшилган. У "россонерилар" билан 2021/22 йилги мавсумда Италия чемпионига айланган.