UFC 330 турнирида Йен Гэррини мағлуб этган Ислам Махачев жанг кутганидан мураккаброқ кечганини тан олди. 34 ёшли амалдаги чемпионнинг айтишича, ирландиялик рақибнинг услуби унга муайян қийинчиликлар туғдирган.

Махачев учун биринчи навбатда натижа муҳим бўлган. Шу билан бирга, у октагондаги вазифани нисбатан осонроқ ҳал қилишни режалаштирганини яширмади.

"Энг муҳими — ғалаба. Жанг бироз осонроқ кечади, деб ўйлагандим. Лекин рақиблар ҳам тайёргарлик кўрмоқда ва ҳар сафар кучлироқ бўлиб боряпти. Демак, мен ҳам жангларни осонроқ ўтказиш учун янада кўпроқ ишлашим керак", — деди Махачев.

Чемпион Гэррининг жисмоний хусусиятлари ва ҳаракатланиш услуби унга яқин масофага киришни қийинлаштирганини таъкидлади. Айниқса, ирландияликнинг узун қўл ва оёқлари Махачевни бошқача тактика қўллашга мажбур қилган.

"Унинг услуби жуда ноқулай. Унга яқинлашиш қийин. Очиқ қолган асосий нуқта олдинги оёғи эди. Мен шу имкониятдан фойдаланиб, тейкдаунларга кирдим", — дея тушунтирди у.

Махачевнинг фикрича, Гэрри асосан орқага чекиниб ҳаракат қилгани сабаб жангни томошабоп тарзда олиб бориш осон бўлмаган. Шу боис россиялик спортчи ортиқча таваккал қилмасдан, ўз режасига содиқ қолган ва баҳсни ҳакамлар қароригача етказган.

"Жанг оғир кечди, аммо нимадир режадагидек бўлмади, деб айтмайман. Ҳаммаси назоратда эди. Вазият шундай бўлдики, шошилмасдан жангни ҳакамлар қароригача олиб бориш керак бўлди", — деди Махачев.