"Сабаҳ" бош мураббийи Валдас Дамбраускас жамоасининг Чемпионлар Лигаси умумий босқичига йўл олганидан кейин ҳиссиётларини баён қилди.
Боку клуби ҳал қилувчи учрашувда Исроилнинг "Хапоэл" жамоасини 5:2 ҳисобида мағлуб этди. Сафардаги биринчи баҳсда 1:2 ҳисобида ютқазган "Сабаҳ" икки ўйин натижасига кўра 6:4 ҳисобида устун келди.
Дамбраускаснинг айтишича, учрашув осон кечмаган. Рақибнинг фаол босими айрим вазиятларда "Сабаҳ" футболчиларини хатога мажбур қилган, аммо жамоа зарур пайтда ўйинни ўз фойдасига буришга эришган.
"Бу кечани стадионга келган мухлислар узоқ вақт эслаб юради. Футболчиларим билан фахрланаман. Улар майдонда бор имкониятини ишга солди. Биз дунёдаги энг нуфузли клуб турнири босқичига чиқдик. Ҳозир мен ўзимни дунёдаги энг бахтли мураббийдек ҳис қиляпман", — деди литвалик мутахассис.
Шу тариқа, 2017 йилда ташкил этилган "Сабаҳ" ўз тарихида биринчи марта УЕФА Чемпионлар Лигасининг умумий босқичига йўлланма олди.
Боку жамоаси сўнгги мавсумда ҳам тарихий натижа қайд этиб, илк бор Озарбайжон чемпионлигини қўлга киритган эди.
