Руминия футбол федерацияси (FRF) Жанни Инфантинони ФИФА президентлиги сайловида қўллаб-қувватламайди. Бундай қарор 26 август куни FRF ижроия қўмитаси йиғилишида қабул қилинди.
"Биз Жанни Инфантинога бўлган ишончни йўқотдик. Бу шуни англатадики, агар у иштирок этишдан воз кечмаса ва 2027 йил март ойида ўз номзодини илгари сурса, биз унга овоз бермаймиз", — деди FRF президенти Рэзван Бурляну.
Норозиликка Инфантинонинг ФИФА тасарруфида ўтказиладиган йирик мусобақаларнинг медиа ва тижорий ҳуқуқларидан олинадиган даромадлар билан боғлиқ сўнгги лойиҳаси сабаб бўлган.
Бурляну FRF аввал ҳам ФИФА раҳбариятининг бир қатор ташаббусларига қарши чиққанини эслатди.
Хусусан, Руминия футбол федерацияси клублар ўртасидаги жаҳон чемпионатининг айрим тижорий ҳуқуқларини бошқа тузилмаларга бериш лойиҳасига, шунингдек жаҳон чемпионатини ҳар икки йилда бир марта ўтказиш ғоясига қарши бўлган.
