«Милан» Рафаэл Леаунинг келажаги бўйича масалани тезроқ ҳал қилишни истамоқда. Николо Скира маълумотига кўра, «россонерилар» вингер учун Туркиянинг «Галатасарой» ва Англиянинг «Астон Вилла» клубларидан тушган таклифларни қабул қилган. Ҳар икки клуб ҳам футболчи учун 45–50 миллион евро тўлашга тайёр.

Италия гранди раҳбарияти португалиялик футболчи бугун, пайшанба куни фаолиятини қаерда давом эттиришини танлашига умид қилмоқда.

Манбага кўра, «Галатасарой» 27 ёшли Леауга 2030 йилга қадар мўлжалланган ва йилига 12 миллион евро маош кўзда тутилган шартнома таклиф қилган.

«Астон Вилла» эса узоқроқ муддатли — 2031 йилга қадар шартнома таклиф этмоқда, аммо маош миқдори камроқ — йилига 8 миллион евро.

Рафаэл Леау 2019 йилдан буён «Милан» сафида тўп тепиб келмоқда.