«Аякс» «Жирона»нинг украиналик қанот ҳужумчиси Виктор Циганков билан шартнома имзолаганини расмий равишда эълон қилди.

Томонлар 2029 йил 30 июнгача мўлжалланган шартнома тузишди. Аввалроқ трансфер суммаси тахминан 3,5 миллион еврони ташкил қилиши ҳақида хабар берилган эди.

Циганков «Жирона»нинг Сегундадаги биринчи турида «Леганес»га қарши 1:1 ҳисобидаги ўйиндан сўнг жамоа кийиниш хонасида юзага келган жанжалда иштирок этган эди. Ундан ташқари, жанжалда клуб тиббий штаби вакилларидан бири ҳам қатнашган.

Жанжалга украиналик футболчи атрофидаги вазият сабаб бўлган. Циганков клубни тарк этиш истагини билдирган ва «Леганес»га қарши ўйинда майдонга тушишдан бош тортган эди.

«Аякс»нинг Циганковни трансфер қилишга қизиқиши ҳақида дастлабки хабарлар май ойининг охирида пайдо бўлган. Мавсумлар оралиғида амстердамликлар жамоаси бош мураббийи Мичел бўлди. У «Жирона»да украиналик футболчи билан бирга ишлаган ва унинг имкониятларини яхши билади.

Ўтган мавсумда Циганков барча мусобақаларда 34 та учрашувда иштирок этиб, 7 та гол урди ва 5 та голли узатма амалга оширди.

«Аякс» Эредивизи чемпионатининг дастлабки икки ўйинида 4 очко тўплади. Мичел бошчилигидаги жамоа навбатдаги учрашувини бугун, 27 август куни Конференциялар лигаси саралаш плей-офф босқичи доирасида «Сьон»га қарши ўтказади.