Мюнхеннинг «Бавария» клуби дарвозабони Мануэль Нойер Чемпионлар лигаси 2026/2027 йилги мавсуми умумий босқичи қуръаси якунлари ҳақида фикр билдирди.

«Бу тарихга бой, жуда тенг ва қизиқарли рақиблар. Умуман олганда, биз яна умумий босқични кучли саккизликда якунлашни истаймиз — бу бизнинг асосий мақсадимиз.

Сўнгги йилларда «Арсенал»га қарши баҳслар аллақачон классикага айланди. «Атлетико» билан финал ўтказиладиган стадионда ўйнаймиз ва барчамиз бу мавсумда у ерда икки марта ўйнашга умид қиламиз. «Манчестер Юнайтед»га қарши учрашув эса, албатта, Чемпионлар лигасидаги бой тарихга эга мутлақ классика. У ерда ўйнаш — алоҳида воқеа.

Шунингдек, ўтган мавсумда ҳақиқий сенсация қайд этган «Будё-Глимт», «Лилль», Праганинг «Славия»си, «Бетис» ва Ставангернинг «Викинг»ига қарши ўйинларни ҳам менсимаслигимиз керак. Биз бу синовларни интиқлик билан кутяпмиз», — дея Нойернинг сўзларини «Бавария» расмий сайти келтирди.

Мюнхен клуби Чемпионлар лигаси 2026/2027 йилги мавсуми умумий босқичида Лондоннинг «Арсенал», «Атлетико Мадрид», «Бетис», «Манчестер Юнайтед», «Будё-Глимт», «Лилль», «Славия» ва «Викинг» жамоаларига қарши ўйнайди.