«Кристал Пэлас» ҳужумчиси Жан-Филипп Матета машғулот пайтида соннинг орқа қисми мушакларидан жароҳат олди ва тахминан тўрт ҳафта майдонга туша олмайди. Бу ҳақда The Athletic хабар берди.

29 ёшли француз футболчиси жорий ёзда клубни тарк этишни режалаштирган эди. Аввалроқ «Астон Вилла» Матета учун таклиф юборган, бироқ «Кристал Пэлас» таклиф қилинган сумма клуб кутган миқдордан анча паст бўлгани сабаб уни рад этган.

Январь ойида «Ноттингем Форест» Матета учун тахминан 41 миллион евро таклиф қилган эди. Шунингдек, «Милан» ҳам «Кристал Пэлас»га расмий таклиф юборган, аммо италияликлар кейинчалик тиббий кўрикдан сўнг битимдан воз кечган.

Ўтган мавсумда Матета Англия Премьер-лигасида 32 та учрашувда майдонга тушиб, 12 та гол урган.