The Athletic хабарига кўра, "Ливерпуль" академиясининг иқтидорли футболчиси Жошуа Абе уч ойгача майдондан ташқарида қолиши мумкин.
16 ёшли футболчи узоқ вақтдан бери безовта қилиб келаётган елкасидаги муаммо сабаб жарроҳлик амалиётини ўтказди.
Абе Мерсисайддаги энг истиқболли ёш футболчилардан бири сифатида баҳоланади. У мавсумолди тайёргарлиги доирасида "Ливерпуль"нинг АҚШдаги турнесида асосий жамоа билан бирга иштирок этган.
Ёзда у бошқа клубларнинг таклифларини рад этиб, "Ливерпуль" билан стипендия шартномасини имзолади. Шунингдек, футболчи 17 ёшга тўладиган келаси йил июль ойида имзолаши мумкин бўлган илк профессионал шартнома бўйича ҳам дастлабки келишув мавжуд.
