Аргентина футбол ассоциацияси 2026 йилги ЖЧ финалидан сўнг юз берган жанжалда иштирок этган жамоа аъзоларига берилган жазолар юзасидан FIFA’га шикоят йўллаган эди. Унда дисквалификация қилинган футболчиларга жазони фақат расмий турнирларда эмас, балки яқин орадаги “А” тоифасидаги ўртоқлик учрашувларида ҳам ўташга рухсат бериш сўралган.
FIFA Тартиб-интизом қўмитаси мурожаатни кўриб чиқиб, АФА сўровини маъқуллади. Бу шуни англатадики, дисквалификация қилинган футболчилар жазоларини тезроқ ўтаб, терма жамоа сафига қайтишлари мумкин.
Шу билан бирга, Аргентина футбол ассоциацияси FIFA’дан жазолар бўйича тўлиқ асослантирилган ҳужжатларни кутмоқда. Шундан сўнг улар ташкилотнинг Апелляция қўмитасида эътироз билдирмоқчи. Агар бу ҳам ёрдам бермаса, ассоциация юристлари Лозаннадаги Спорт арбитраж судигача (CAS) мурожаат қилишга тайёр.
Маълумот учун, ЖЧ-2026 финали якунланганидан сўнг Аргентина терма жамоаси яримҳимоячиси Паредес Испания футболчилари билан тортишиб қолган. FIFA қўмитаси аргентиналик футболчини учта қоидабузарликда айбдор деб топиб, унга 10 та ўйинга дисквалификация ва 90 минг доллар жарима белгилаган эди.
Аргентина терма жамоасининг яна икки футболчиси ҳам жазога тортилган. Ноэл Молинага 7 та ўйинлик четлатиш ва 90 минг доллар жарима, Тиаго Алмадага эса бир учрашувлик дисквалификация ҳамда 30 минг доллар миқдорида жарима белгиланган эди.
Мазкур можаро 19 июль куни АҚШнинг Нью-Жерси штатидаги “Метлайф” стадионида бўлиб ўтган ЖЧ-2026 финалидан сўнг юз берган. Унда Испания қўшимча вақтда Ферран Торреснинг голи эвазига Аргентина устидан 1:0 ҳисобида ғалаба қозониб, Жаҳон чемпионига айланган.
