«Ювентус» бош мураббийи Лучано Спаллетти ярим ҳимоячи Франк Кесси билан музокаралар нега муваффақиятсиз якунлангани ҳақида фикр билдирди.

Туринликлар узоқ вақт давомида Кот-д’Ивуар футболчисини қўлга киритиш учун асосий даъвогар сифатида қаралаётган эди. Бироқ якунда томонлар келишувга эриша олмади. Шанба куни эса 29 ёшли футболчининг аввал ҳам ўйнаган «Аталанта» клубига қўшилгани расман эълон қилинди.

«Мен Кессига барча яхшиликларни тилайман. У - профессионал. Биз хабар алмашиб турдик, у ҳатто мендан узр сўради, чунки бизнинг жамоага ўтишни истаган эди. Аммо мен унинг вазияти ҳақида етарлича маълумотга эгаман ва нима содир бўлганини биламан», — деди Спаллетти А Серия 2-турида «Парма» устидан 2:0 ҳисобида қозонилган ғалабадан кейин.

Франк Кесси эркин агент мақомида эди. У жорий ёзда Саудия Арабистонининг «Ал-Аҳли» клубини тарк этган.