"Гулистон" жамоаси бош мураббийи Аббос Эргашев Ўзбекистон кубоги нимчорак финалида "Сурхон" устидан қозонилган ғалабадан сўнг ўз фикрларини билдирди.

"Бугун қийин ўйин бўлишини олдиндан билардик. Чунки "Сурхон" сўнгги вақтларда Суперлигада ҳам жуда яхши футбол намойиш этмоқда. Жамоанинг охирги турларда ҳатто "Пахтакор" майдонидан бир очко билан қайтгани ҳам бу фикримга яққол мисол бўла олади.

Термизликлар таркибида ҳам тактик, ҳам техник жиҳатдан кучли футболчилар бор. "Сурхон" доимо чиройли ва томошабоп футбол кўрсатишга интиладиган жамоа. Биз рақибни яхши ўрганиб чиқдик. Гарчи Биринчи лига вакили бўлсак-да, ўзимизнинг кучли томонларимиздан максимал даражада фойдаланишга ҳаракат қилдик.

Якунда эса Биринчи лига клублари тарихида биринчи бўлиб Ўзбекистон кубогининг чорак финалига чиққан жамоага айландик. Жамоамиз билан мана шундай ажойиб тарих яратганимиздан жуда хурсандман.

Ушбу ғалаба билан бутун Сирдарё халқини табриклайман. Бу ғалабамизни Мустақиллигимизнинг 35 йиллиги шарафига мухлисларимизга совға сифатида бағишладик.

Шунингдек, ушбу муваффақият билан вилоятимиз ва клубимиз раҳбарларини ҳам муборакбод этаман. Улар майдон ташқарисида жуда катта ишларни амалга оширишмоқда. Ғалабаларимизда уларнинг ҳам ҳиссаси катта. Насиб қилса, ушбу раҳбарият билан биргаликда ривожланишда давом этамиз", — деди Аббос Эргашев.