«Манчестер Юнайтед» бош мураббийи Майкл Каррик Англия Премьер-лигасининг 1-турида «Халл Сити»га 0:2 ҳисобида учралган мағлубиятни жамоанинг ҳаракат ёки иштиёқ етишмаслиги билан боғлаш тўғри эмаслигини таъкидлади.
Мутахассисдан жамоанинг бундай ўйинига нима сабаб бўлгани сўралди.
«Сиз анчадан бери футбол томоша қиласиз, тўғрими? Жамоалар ғалаба ҳам қозонади, мағлуб ҳам бўлади. Бу фақат қанчалик ҳаракат қилганингиз ёки қилмаганингизга боғлиқ эмас. Сабаблар жуда кўп бўлиши мумкин. Мен уларнинг барчасини тушунтириб ўтиришим шарт эмас, чунки биз нималар устида ишлаётганимизни яхши биламиз.
Жамоа мағлуб бўлса, дарҳол: «Бу нотўғри, у нотўғри, ҳаракат етишмади, иштиёқ кам бўлди», дейиш жуда осон. Бу энг оддий жавоб. Аммо футбол учрашувида натижага салбий таъсир қилиши мумкин бўлган жуда кўп омиллар бор.
Эҳтимол, аввал ҳам худди шундай ўйнаб, 1:0 ҳисобида ғалаба қозонганмиз ва ўшанда ҳамма: «Қандай ажойиб жамоа, қандай ажойиб мураббий, қандай ажойиб футболчилар», деган. Шунинг учун, менинг нуқтаи назаримдан, таҳлилда фақат натижага қараб хулоса чиқариш тўғри эмас.
Биз масалага чуқурроқ кириб, тафсилотларни таҳлил қилишимиз керак. Худди шунингдек, ғалаба қозонганимизда ҳам ҳаддан ташқари хурсанд бўлиб кетмаслигимиз лозим, чунки ўйинимизда ҳамма нарса мукаммал бўлмаганини биламиз», — деди Каррик.
«Манчестер Юнайтед» бугун АПЛ 2-турида ўз майдонида «Ипсвич Таун»ни қабул қилади.
