«Manchester Yunayted» bosh murabbiyi Maykl Karrik Angliya Premyer-ligasining 1-turida «Xall Siti»ga 0:2 hisobida uchralgan mag‘lubiyatni jamoaning harakat yoki ishtiyoq yetishmasligi bilan bog‘lash to‘g‘ri emasligini ta’kidladi.

Mutaxassisdan jamoaning bunday o‘yiniga nima sabab bo‘lgani so‘raldi.

«Siz anchadan beri futbol tomosha qilasiz, to‘g‘rimi? Jamoalar g‘alaba ham qozonadi, mag‘lub ham bo‘ladi. Bu faqat qanchalik harakat qilganingiz yoki qilmaganingizga bog‘liq emas. Sabablar juda ko‘p bo‘lishi mumkin. Men ularning barchasini tushuntirib o‘tirishim shart emas, chunki biz nimalar ustida ishlayotganimizni yaxshi bilamiz.

Jamoa mag‘lub bo‘lsa, darhol: «Bu noto‘g‘ri, u noto‘g‘ri, harakat yetishmadi, ishtiyoq kam bo‘ldi», deyish juda oson. Bu eng oddiy javob. Ammo futbol uchrashuvida natijaga salbiy ta’sir qilishi mumkin bo‘lgan juda ko‘p omillar bor.

Ehtimol, avval ham xuddi shunday o‘ynab, 1:0 hisobida g‘alaba qozonganmiz va o‘shanda hamma: «Qanday ajoyib jamoa, qanday ajoyib murabbiy, qanday ajoyib futbolchilar», degan. Shuning uchun, mening nuqtai nazarimdan, tahlilda faqat natijaga qarab xulosa chiqarish to‘g‘ri emas.

Biz masalaga chuqurroq kirib, tafsilotlarni tahlil qilishimiz kerak. Xuddi shuningdek, g‘alaba qozonganimizda ham haddan tashqari xursand bo‘lib ketmasligimiz lozim, chunki o‘yinimizda hamma narsa mukammal bo‘lmaganini bilamiz», — dedi Karrik.

«Manchester Yunayted» bugun APL 2-turida o‘z maydonida «Ipsvich Taun»ni qabul qiladi.