«Барселона» бош мураббийи Ҳанси Флик трансфер ойнаси ёпилиши арафасида жамоага яна янги футболчилар келиши мумкинлиги ҳақида фикр билдирди.

Мутахассисдан ҳозирги таркибдан қанчалик мамнун экани ва мухлисларни яна қандайдир трансфер сюрпризлари кутаётган-кутмаётгани сўралди.

«Албатта, мен жамоамдан мамнунман. Қўлимдаги таркибдан жуда хурсандман. Деку бу йўналишда иш олиб бормоқда. Агар у жамоани янада кучайтириш имкониятини топса, албатта, бундан фойдаланишга ҳаракат қилади.

Аммо биз ҳеч қандай босим остида эмасмиз. Гап фақат жамоани янада кучайтириш имконияти ҳақида кетмоқда. Деку ҳозирга қадар ажойиб ишларни амалга оширди.

Мен учун машғулотларда намоён этаётган сифатимиз ҳам жуда муҳим. Мураббий сифатида айнан шу жиҳат мен учун энг аҳамиятлиси. Менимча, ҳозир биз тўғри йўлдамиз», — деди Флик «Райо Вальекано»га қарши ўйиндан олдин.