«Ливерпуль» сардори Виржил ван Дейк Коди Гакпонинг жамоадан кетиши мумкинлиги ҳақида фикр билдирди.

Аввалроқ «қизиллар» ҳужумчиси «Манчестер Сити»га ўтиш бўйича келишувга эришгани хабар қилинган эди. Мерсисайдликлар 27 ёшли футболчини унинг ўрнига муносиб номзод топилганидан сўнг қўйиб юборишга тайёр.

Нидерландиялик футболчидан терма жамоадаги шериги клубда қолишини хоҳлайдими, деб сўрашди.

«Нима деб ўйлайсиз? У сифатли футболчи. Менимча, биз сифатли футболчиларни сақлаб қолишимиз керак.

Кейинги бир неча кун нималар олиб келишини кўрамиз. Мен унинг нафақат сифатли футболчи бўлгани учун, балки дўстим бўлгани учун ҳам қолишини хоҳлайман. У биз учун жуда муҳим», — деди ван Дейк «Ноттингем Форест» билан 2:2 ҳисобидаги ўйиндан сўнг.