«Реал»нинг собиқ футболчиси, мураббийи ва директори Хорхе Вальдано Килиан Мбаппенинг «Олтин тўп» учун номзодлигини қўллаб-қувватлади. Бу француз ҳужумчиси ўтган мавсумда Мадрид клуби билан бирорта ҳам соврин қўлга киритмаганига қарамай айтилди.

Movistar Plus Deportes эфирида сўзлаган Вальдано Мбаппенинг «Сантьяго Бернабеу»га келганидан буён мунтазам гол уриб келаётганини алоҳида таъкидлади.

«Ҳақиқатдан ҳам, бу Мбаппенинг мавсумни энг яхши бошлаши. Шуни ҳам унутмайликки, у биринчи йили Европанинг энг яхши тўпурари бўлган, ўтган мавсумда эса Ла Лиганинг энг сермаҳсул футболчисига айланган. Яъни, бир футболчидан бундан ортиқ яна нима талаб қилиш мумкин?» — деди Вальдано.

Аргентиналик мутахассис француз ҳужумчисининг ҳозирги формасига юқори баҳо берди.

«Мен Мбаппега тўлиқ ишонаман. Килиан менга ҳозир фаолиятининг мутлақ энг юқори нуқтасига чиққан топ-даражадаги футболчидек туюлаяпти. Ёши, ишончи ва маҳорати нуқтаи назаридан у айни камолот чоғида», — деди у.

Вальдано шу сабаб Мбаппенинг «Олтин тўп» учун асосий даъвогарлар қаторида тилга олинишини мутлақо мантиқий деб ҳисоблайди.

«Мбаппенинг «Олтин тўп»ни қўлга киритишга номзодлардан бири экани мени умуман ҳайрон қолдирмайди», — деди у.

Шунингдек, Вальдано «Реал» ўтган мавсумда совринсиз қолгани сабаб Мбаппенинг имкониятларини паст баҳолаётганларга ҳам жавоб қайтарди.

«Улар Мбаппе ҳеч қандай соврин ютмади, дейишяпти. Аммо жамоа бир бутун механизм сифатида ўз ўйинини топа олмаётган пайтда гол уриш анча қийинроқ», — деди Вальдано.

Мбаппе янги Ла Лига мавсумини ҳам юқори суръатда бошлади. У дастлабки уч турда 4 та гол уришга муваффақ бўлди.