Аргентина футбол ассоциацияси Лионель Мессининг миллий терма жамоадаги фаолиятини якунлаши муносабати билан унга миннатдорлик билдирди.

Ассоциация Мессининг 20 йилдан ортиқ вақт давомида Аргентина терма жамоаси шарафини муносиб ҳимоя қилганини таъкидлади.

«Месси терма жамоани чемпион сифатида, сардор ва афсона мақомида тарк этмоқда. Аммо унинг мероси совринлардан ҳам устун — у Аргентина футболи ва миллионлаб мухлислар қалбида ўчмас из қолдирди», — дейилади ассоциация баёнотида.

Шунингдек, ташкилот Мессининг ҳар бир голи, ассисти, ўйини ва терма жамоа учун қилган меҳнати учун унга миннатдорлик билдирди.

Аргентина терма жамоасининг расмий саҳифаси ҳам футболчига муносабатини билдириб, «Лео, сендан абадий миннатдормиз. Сени умримизнинг охиригача севиб қоламиз», дея таъкидлади.