«Челси» аргентиналик ярим ҳимоячиси Энцо Фернандес «Манчестер Сити»нинг қизиқишига қарамай, клубда қолиши мумкин. Бу ҳақда Daily Telegraph журналисти Мэтт Лоу хабар берди.

Манбага кўра, «Челси» трансфер ойнасининг сўнгги куни Энцога ўринбосар футболчи сотиб олмаса, уни «Манчестер Сити»га қўйиб юбормайди. «Кўклар»нинг учта номзоди бор — «Монако»дан Ламин Камара, «Рома»дан Ману Коне ва Премьер-лиганинг номи ошкор этилмаган яна бир футболчиси.

Бироқ «Монако» «Челси»нинг Камарани сотиб олиш бўйича таклифини аллақачон рад этган. «Рома» бош мураббийи Жан Пьеро Гасперини эса Коне жамоада қолишини қатъий истамоқда. Шу сабабли Энцонинг «Манчестер Сити»га ўтиши қийинлашган.

Бундан ташқари, «Челси» «шаҳарликлар»дан Фернандес учун яхшиланган таклиф кутиб қолмоқда. Аввалроқ Лондон клуби футболчи учун қониқарсиз деб топилган таклифни рад этган эди.