Мадриднинг «Атлетико» клуби ҳужумчиси Хулиан Альварес клубда қолишга қарор қилди. Бу ҳақда журналист ва инсайдер Белен Санчес Гарсия X ижтимоий тармоғида маълум қилди.

Манбага кўра, аргентиналик форвард «Арсенал»нинг таклифини рад этган, шунингдек, бошқа бир қатор клубларнинг таклифларини ҳам қабул қилмаган.

Аввалроқ Альварес «Атлетико»дан уни «Барселона»га қўйиб юборишни сўрагани, бироқ мадридликлар каталонияликлар билан музокара олиб боришдан бош тортгани хабар қилинган эди.

Ўтган мавсумда Альварес «Атлетико» сафида 49 та ўйинда 20 та гол урди ва 9 та голли узатмани амалга оширди.

Аввалроқ аргентиналик футболчи жорий ёзда «Атлетико»ни тарк эта олмаслигига кўниккани ва жамоа билан бирга машғулотларга қайтгани ҳақида хабар берилган эди.