Diario Sport маълумотига кўра, «Мальорка» «Барселона»нинг ёш ярим ҳимоячиси Гилье Фернандес трансфери бўйича келишувга эришди.

18 ёшли «Ла Масия» тарбияланувчиси кейинги клуби масаласини ҳал қилиш учун бир муддатдан бери «Барса Атлетик» жамоасидан алоҳида машғулот олиб бораётган эди.

Ўтган мавсум Сегунда дивизионига тушиб кетган «Мальорка» футболчининг трансфери учун жами 4,5 миллион евро тўлайди. Ушбу сумманинг 3 миллион евроси кафолатланган тўлов, яна 1,5 миллион евроси эса бонуслардан иборат.

«Барселона» келишувга футболчининг кейинги трансферидан 50 фоиз улуш олиш шартини ҳам киритган. Шунингдек, каталонияликларда Гилье Фернандесни 20 миллион евро эвазига қайта сотиб олиш ҳуқуқи бўлади.

Яқинда Гильенинг амакиваччаси Тони Фернандес ҳам «Барселона»ни тарк этиб, «Венеция» сафига қўшилган эди.