«Аталанта» ёзги трансфер ойнасининг сўнгги кунида бир йўла икки янги футболчини ўз сафига қўшди.

Бергамо клуби «Болонья» вингери Жонатан Роуни ижарага олди. Келишувга футболчини кейинчалик сотиб олиш ҳуқуқи ҳам киритилган ва муайян шартлар бажарилса, бу банд мажбурий тус олади.

Sky Sport Italia маълумотига кўра, «Аталанта» Роунинг ижараси учун 5 миллион евро тўлайди. Футболчини тўлиқ сотиб олиш эса яна 30 миллион еврога тушади. Бундан ташқари, битимда 5 миллион еврогача бонуслар ҳам кўзда тутилган.

Шу тариқа, трансфернинг умумий қиймати 40 миллион еврогача етиши мумкин.

Роу ўтган мавсум А Серияда 28 та ўйин ўтказиб, 3 та гол урди ва 2 та голли узатмани амалга оширди.

«Аталанта» шунингдек, «Козенца»нинг 20 ёшли дарвозабони Томас Помпейни ҳам ўз сафига қўшди.