Дания, Швеция ва Финляндия футбол федерациялари ФИФА ва унинг президенти Жанни Инфантино билан боғлиқ вазият юзасидан Европа Комиссиясига мурожаат қилди.
Уч мамлакат футбол федерациялари Европа Комиссиясининг спорт масалалари бўйича комиссари Гленн Микаллефга ФИФАдаги инқироз ва Жанни Инфантино фаолиятига нисбатан ишончнинг пасайиши фонида хат йўллади.
«ФИФАдаги сўнгги воқеалар бизда жиддий хавотир уйғотмоқда. Шимолий Европа мамлакатларида ФИФАдаги бошқарув, шаффофлик ва қарор қабул қилиш билан боғлиқ муаммолардан хавотир билдириб келдик.
FIFA Forward Enterprise ғояси бу хавотирларни янада кучайтирди. Хусусий инвесторларнинг ФИФА мусобақаларида улуш сотиб олиш эҳтимоли, шунингдек, шаффофлик, маслаҳатлашувлар ва демократик назорат етишмайдиган жараён дунё футболи келажагини аслида ким назорат қилиши ҳақида жиддий саволларни келтириб чиқармоқда.
Европа институтлари, УЕФА ва миллий футбол ассоциациялари турли ролларга эга ва турлича масъулиятни зиммасига олади. Аммо бизни очиқлик, демократия, спортдаги натижалар ва ҳамжиҳатликка асосланган моделни ҳимоя қилиш истаги бирлаштиради.
2021 йилда Европа Суперлигасини ташкил этишга бўлган уриниш Европа футбол ассоциациялари ва сиёсатчилари ўйиннинг асосий тамойилларини ҳимоя қилиш учун бирлашганда нималарга эришиш мумкинлигини кўрсатди. Сўнгги воқеалар бундай ҳамкорлик ҳануз зарурлигини кўрсатмоқда.
Шунинг учун Финляндия, Швеция ва Дания футбол ассоциациялари президентлари Брюсселга ташриф буюриб, сиз билан учрашса, биз учун катта шараф бўлар эди.
Биз футболнинг руҳи ҳеч қачон қайтадан сотувга қўйилмаслигини таъминлашимиз керак», — дейилади федерациялар хатида.
