«Реал» Вальдебебасдаги машғулот базасида реклама мажбуриятларининг катта қисмини бажаришга қарор қилди. Marca хабарига кўра, клуб деярли барча футболчиларни бунга жалб қилган.
Эрталабдан базага кўплаб камералар ва суратга олиш майдончалари ўрнатилди. Футболчилар залдаги машғулот, физиотерапевт қабули ва тикланиш жараёнларидан сўнг ёки машғулот олдидан навбат билан суратга тушишди.
Жозе Моуринью суратга олиш ишларига вақт ажратиш учун машғулотни соат 17:00 га кўчирди. Бош мураббийнинг ўзи ҳам жараённи назорат қилиш мақсадида суратга олиш ҳудудларидан икки марта ўтди.
Жуд Беллингем билан боғлиқ кичик муаммо ҳам юзага келди. «Луи Вюиттон» бренди элчиси бўлган футболчининг шахсий реклама мажбуриятлари бошқа брендлар билан ҳамкорликка мос келиши масаласи кўтарилди. Бироқ вазият тезда ҳал қилинди.
