Ўзбекистонлик ҳакамлар ва расмийлар Осиё Элит Чемпионлар лигасининг биринчи тур учрашувларида фаолият олиб боради.

Илгиз Танташев бошчилигидаги ҳакамлар бригадаси 15 сентябрь куни БААда бўлиб ўтадиган «Ал-Айн» ва «Ан-Наср» жамоалари ўртасидаги баҳсни бошқариб боради.

Учрашувда Илгиз Танташев бош ҳакам сифатида ишлайди. Унга қанотларда Андрей Сапенко ва Тимур Гайнуллин ёрдам беради. Аҳрол Рисқуллаев эса VAR ҳаками вазифасини бажаради.

Шунингдек, яна икки нафар ўзбекистонлик мутахассис Осиё Элит Чемпионлар лигасининг дастлабки тур учрашувларига тайинланган.

14 сентябрь куни Саудия Арабистонида ўтадиган «Ал-Қодисия» — «Ал-Васл» баҳсида Владислав Сейтлин ҳакамлар назоратчиси сифатида ишлайди.

16 сентябрь куни Таиландда ташкил этиладиган «Порт FC» — «Виссел Кобе» учрашувида эса Валентин Коваленко ҳакамлар назоратчиси вазифасини бажаради.