Ёзги трансфер ойнасининг сўнгги кунида «Роял Антверпен» сафига ўтган Альваро Кортес «Барселона» ва клуб мухлисларига таъсирли хайрлашув мурожаатини йўллади.

«Мен Барселонадан узоқда туғилганман, аммо доимо ўзимни «Барса» мухлиси — куле сифатида ҳис қилганман. Шу жамоани кузатиб улғайдим, унинг ғалабаларини нишонладим ва бир куни бу либосни кийишни орзу қилдим. Ниҳоят, 16 ёшимда ҳаётимни бутунлай ўзгартирган қўнғироқни олдим», — деб ёзди испаниялик ҳимоячи Instagram саҳифасида.

«Болалик орзумни амалга ошириш учун уйим ва шаҳримни тарк этдим. Ўша кундан бошлаб ҳақиқатан ҳам бахтли бўлдим. Бу гербни ва сардорлик боғичини доимо катта фахр ва ҳурмат билан тақдим этдим.

Бугун эса мен кутмаган тарзда ва ўзим истамаган шаклда хайрлашишимга тўғри келмоқда. Аммо футболда ҳам, ҳаётда ҳам ҳар доим бир боб қачон ва қандай якунланишини ўзимиз танлай олмаймиз.

Мен бу ердан бор кучимни берганимни билган ҳолда хотиржам кетяпман. 16 ёшли болага ишонгани, мен учун эшикларини очгани ва ҳаётимдаги энг катта орзуни амалга ошириш имконини бергани учун «Барселона»дан чексиз миннатдорман.

Шу йиллар давомидаги ўрганиш, меҳнат, қурбонликлар ва умрбод хотирамда қоладиган лаҳзалар учун раҳмат. Бу ерда мен нафақат футболчи, балки энг аввало инсон сифатида улғайдим. Шунингдек, бу герб нимани англатиши ва қандай қадриятларни ифода этишини тушундим.

Барча мураббийлар, координаторлар, спорт директорлари, жамоадошларим ва бу йўлни мен билан бирга босиб ўтган барча инсонларга чин дилдан раҳмат айтаман. Ҳар бирингиз менда ўз изингизни қолдирдингиз ва бугунги инсон бўлиб шаклланишимга ёрдам бердингиз.

Шунингдек, мухлисларга ҳам менга кўрсатган меҳр ва қўллаб-қувватлови учун алоҳида миннатдорчилик билдираман. Бу гербни ҳимоя қилиш мен учун фахр ва шараф эди».