Франциянинг «Ланс» клуби X ижтимоий тармоғида поляк ҳимоячиси Майк Навроцкийнинг жароҳати ҳақида маълум қилди. Футболчи Франция чемпионатининг 2-туридан ўрин олган «Страсбург»га қарши учрашувнинг 62-дақиқасида алмаштирилган эди. Баҳс «Ланс»нинг 1:2 ҳисобидаги мағлубияти билан якунланди.

«Тезроқ соғайиб кет, Майк. Майк Навроцкий жиддий жароҳат олди — унинг тиззасидаги олд хочсимон боғлам тўлиқ узилган ва энди у жарроҳлик амалиётини бошдан кечиради. Бутун клуб ҳимоячимизни қўллаб-қувватламоқда ва унга тезроқ соғайиб, сафга қайтишини тилайди», — дейилади «Ланс» хабарида.

Жорий мавсумда 25 ёшли Майк Навроцкий Франция чемпионатида иккита ўйинда майдонга тушди. У ҳозирча гол ёки голли узатма билан ажралиб тургани йўқ.

Transfermarkt портали поляк ҳимоячисининг трансфер қийматини 1,5 миллион еврога баҳоламоқда.