"Барселона" 18 ёшли мисрлик ҳужумчи Ҳамза Абделкарим билан шартнома шартларини яхшилаш устида ишламоқда. SPORT маълумотига кўра, каталонияликлар футболчининг ёзги тайёргарликдаги ёрқин ўйинидан кейин унга бўлган қизиқиш ортиб кетишидан хавотир олган.
Абделкарим мавсумолди йиғинларида 5 та ўйинда 4 та гол уриб, "Барселона"нинг энг яхши тўпурари бўлди. Шунга қарамай, Ла Лиганинг дастлабки икки турида у майдонга туширилмади. Испания матбуоти буни футболчининг шартномасидаги товон пули атиги 15 млн евро экани билан боғламоқда. Клуб унинг бадалини 150 млн еврогача оширишни режалаштирган.
Бироқ Абделкарим 31 август куни "Райо Вальекано"га қарши баҳсда асосий жамоа сафида расмий дебют қилишга улгурди. Ҳанси Флик уни учрашувнинг сўнгги дақиқаларида Рафинья ўрнига майдонга туширди. Шу тариқа, у "Барселона" тарихида расмий ўйинда қатнашган илк мисрлик футболчи бўлди.
Ҳамзанинг амалдаги шартномаси 2029 йилгача мўлжалланган. "Барселона" уни ёзда "Ал-Аҳли"дан 1,5 млн евро ва бонуслар эвазига тўлиқ сотиб олган эди. Янги келишувда маош ҳам оширилиши кутилмоқда.
Режага кўра, Абделкарим "Барса Атлетик"да қолади, бироқ асосий жамоа машғулотларида қатнашишда давом этади. Флик ҳам ёш форвард кўпроқ имкониятга лойиқ эканини таъкидлаган.
