"Ливерпуль"нинг ёзги трансфер бозоридаги фаолияти мухлислар томонидан танқид қилинган бўлса-да, клуб ичидаги манбалар янги бош мураббий Андони Ираола қўл остида асосий мақсадларга эришилган, деб ҳисобламоқда.
The Athletic маълумотига кўра, Муҳаммад Салоҳ жамоани тарк этганидан кейин "Ливерпуль"нинг асосий вазифаси қанотларга тезкор ва юқори савияли футболчиларни жалб қилиш бўлган.
Бу йўналишдаги энг йирик трансфер "ПСЖ"дан Брэдли Барколянинг 123 миллион фунт эвазига сотиб олиниши бўлди.
Шунингдек, ҳужум чизиғига Виктор Муньос қўшилди. Рональд Араухо ва Жереми Жаке эса ҳимояни кучайтирди. Бундан ташқари, "Ливерпуль" "Манчестер Сити"нинг қизиқишига қарамай, Коди Гакпони жамоада олиб қолишга муваффақ бўлди.
Liverpool.com хабарига кўра, клуб раҳбарияти ёзги трансфер ойнаси натижаларидан умуман олганда қониққан ва Ираоланинг мураббийлик маҳорати орқали амалдаги таркибдаги футболчилар ҳам янада ривожланишига ишонмоқда.
Шунга қарамай, айрим саволлар очиқ қолмоқда. "Ливерпуль" трансфер ойнасининг сўнгги палласида Исмоили Сарр ва Мало Гюстони ўз сафига қўшиб олишга уриниб кўрди, аммо бу трансферлар амалга ошмади.
Кёртис Жонснинг кетиши ортидан марказий ярим ҳимоядаги захира имкониятлари ҳам хавотир уйғотмоқда. Шу сабабли таркибдаги мувозанатни сақлаш клуб олдидаги асосий вазифалардан бири бўлиб қолмоқда.
